-
-
- DOKUMEANTTAT
-
- Aviisačállosat
Dákkár bajilčállagat oidnojedje aviissain.
Lapin Kansa čálii sohkačoahkkima birra 9.7.2000
siidobeali guhkkosaš muitalusa; dat ii dađibahábut
čága dása. Dat, geat beroštit áššis,
sáhttet ohcat dan ruovttueatnama siiddus 6. Muđui
min searvi bođii oidnosii čuovvovaččat:
-
- Gihtte-sohka vuođđudii
vuosttas sápmelaš sohkasearvvi
- Várra Davviriikkaid
vuosttas sámesoga sohkasearvi lea merkejuvvon virggálaš
registarii. Searvvi máddu, Hánno Ánddebárdni
Gihtte, riegádii 1786:s.
Son lei johttisápmelaš, gii johtalii bohccuidisguin
sihke Norgga, Ruoŧa ja Suoma bealde. Soga bohccuid dálveguohtoneatnamat
ledje Gihttela davágeahčen.
- Sohkasearvvi njunušin
doaibman Jouni Kitti muitala ahte go riikkarájit gokčojuvvojedje,
de Gihtet ásaiduvve eanaš Anára oarjeosiide,
mii lei dan áigge buiga ávdin guovlu.
- Jurdda sohkasearvvi vuođđudeamis
bođii Norgga bealde moadde jagi dassái. Das maŋŋá
leat gávdnon gitta Amerihká ja Austrália
ráje olbmot, geat leat beroštišgoahtán
áššis.
- Searvvi ulbmilin lea gáhttet
Gihtte-soga vuoiŋŋalaš árbbi ja dasa lassin
sámi kultuvrra, giela ja árbevieruid.
- Sohkasearvvi ruovttubáiki
lea Anár, ja doppe lea jurdda doallat maiddái vuosttas
sohkačoahkkima suoidnemánus 2000:s.
- Jouni Kitti muitala ahte
iežas ruohttasiid čilgen ja sohkadutkan ii leat sámiid
gaskkas lassánan seammaláhkai go váldoálbmoga
bealde dáid jagiid. Dát boahtá das, ahte
sámit leat juo ovddežis dábálaččas
bures diehtán iežaset máttuid birra.
- Sohkačoahkkimiid
leat goittot lágidan eará sámesogatge dáid
jagiid. Earret eará Guttorm- ja Magga-sogain lea leamaš
stuorra deaivvadeapmi.
-
- (LK, 29.4.-99)
-
- Sogat
-
- Gihtet deaivvadit Anáris
- Ándaras Hánnobárdni
Gihte sohkasearvi r.s. lágida vuosttas sohkadeaivvadeami
lávvardaga 8.7.2000 Anáris, Davvi-Sámi luondduguovddážis
Siiddas (čujuhus: Inarintie, 99870 Inari; tel. 02 05 64
77 40).
- Lávvardatbeaivvi
seminára Siiddas d. 12-16 lea smávva, nuvttá
ja eahpevirggálaš deaivvadeapmi, muhto sávvat
liikká ahte Ánde Hánnobárdni Gihte
maŋisboahttit dieđihit iežaset boahtimis sohkasearvvi
čállái Maritta Stoor`ii.
- Buresboahtin!
- (LK, 8.6.00)
Gihtet čoahkkái
Ándaras Hánnobárdni
Gihte sohkasearvi r.s. lágida vuosttas sohkadeaivvadeami
lávvardaga dán gease suoidnemánu 9. beaivve
Anáris Davvi-Sámi luondduguovddážis
Siiddas (čujuhus: Inarintie, 99870 Anár, tel. 02
05 64 77 40). Seminára lea buohkaide nuvttá.
- Prográmma lea čuovvovaš:
Oktavuohta-seminára d. 12-16 Siidda auditorios.
Mii čoahkkanat d. 12 Anáris Siida-dállui.
Mii leat várren iežamet atnui auditorio, mas doallat
sohkaseminára. Ovdaságaid leat lohpidan doallat
olbmot, geat gullet min sohkii. Deaivvadeami rahpá sohkasearvvi
ságadoalli Jouni Kitti, gii muitala Ándaras Hánnobárdni
Gihte ja Gihtte-soga sierra muttuid birra.
- Girječálli
Kerttu Vuolab`a fáddán lea "Muitaleaddjit
golmma buolvvas". Kerttu muitala sámi muitalanárbevieru
birra. Son álggaha ádjástis Ándaras-Hánssas
(Hans Kitti) ja máhccá dasto eatnis bokte iežas
rollii sámi girječállin.
- Lektor Maritta Stoor muitala
loahpas oanehaččat sohkasearvedoaimma birra. Min sohkasearvvi
ulbmilinhan lea čohkkegoahtit ja vurkegoahtit árbedieđuid
ee. sohkaprentosa várás.
- Sotnabeaivve suoidnemánu
9. beaivve mii galledat Bealbajávrri meahccegirku d. 12-.
Bealbajávrái vuolgit musea gáttis d. 13
Matti Meskanen`a fanassáhtu mielde. Vuodjit Bealbavutnii.
Mátkki áigge vuodjit maiddái Ádjásullo
meattá, goas sáhttit mielaineamet gudnejahttit
iežamet máttuid muittu. Mátki bistá
beannot diimmu, ja gáttis lea vel sullii 40 minuhta vázzinmátki
meahccegirkui, gos doallat smávva rohkosbottu. Girku luhtte
sáhttá máhccat fas Girkobáikái
guovtte láhkai: juogo vácci (sullii 5 kilomehtera)
fas Márkanbáikái dahje fanassáhtu
mielde.
- Fanas vuolgá gáttis
d. 17. Jos háliidat máhccat fatnasiin, de galggat
almmuheami oktavuođas máinnašit das. Mannanbileahtta
máksá 60 márkki. Várre alccesat niestti
dán mátkki várás.
- Buresboahtin!
- Maritta Stoor
čálli
- (LK, 8.6.00)
-
|
