Dovddus Sápmelaš Inga Näkkäläjrvi jámii njukčámánu 5 beaivve Avvilis 97 jáhkásaččan. Oahpásmuvven Inká Näkkäläjärvii 1951:s ovdalaš juovllaid Anáris, go son bođii herggiiguin viežžat Lismmá skuvlamánáid ja mu juovlabásiide Heikkiläi. Hearggeraidduin Anáris Fáškku gáddái ádjánii máŋga diimmu. Eadnerohkki biigostalai dan áigge Issát ja Inka Näkkäläjärvi; sudnos lei stuorra bearaš. Ingá álggii bargat bohccuiguin dalle go su vánhemat ásse vel goađis. Goađis son maiddái bajásgesii vuostta máná Juháná goalmmát jahkái.

Ingá lea riegádan Eanodaga Bievrrašjávrris, gos lei maiddái eret su isitrohki Issát Näkkäläjärvi. Soai Issáhiin náitaleigga 1931, goas Eanodagas elle boazodoalu dáfus seammasullasaš dilis go dál oppa boazodoalloguovllus; boazu lei sakka laskan, guohtoneatnamat eai gierdan, bohccot lassánedje dalle danin go sihke boazobearrašiin ja dáloniin ledje ollu hearggit. Menddo garra guođoheami gežil jeagil measta nogai. Go Inká lei Issáin náitalan, de soai dolliiga boahccuiguin nuortta guvlui ohcat viidásut ja buoret guohtoneatnamiid. Farrui vulge bearrašiiguin maiddái Iŋggá viellja Ánde ja Benjam Kuru. Sii ceggejedje vuosttas goađi Eanodaga ja Anára rádjeguovlluide Bealdoduoddarii, gos vásihedje vuosttas geasi. Issáha ja Iŋggá čuovvovaš goahtesadji lei Bátneduoddara bálddas, Golggotjávrris. Maŋŋeleabbos Iŋgá ja Issát osttiiga ovttas Lismmás dálu eatnamiiguin ja fárriiga bearrašiin njealje seainni sisa.

Iŋgá lea riegádahttán buohkanassii logi máná, main okta jámii juo áibbas uhccin ja nubbi čiežajahkásažžan obbalákká ráigáneapmái. Bohccuid lassáneapmi ja Lismmá guovllu guossavuvddiid assás muohta ledje sivvan dasa ahte Iŋggá bearaš gárttai vel oktii ohcat buoret guohtoneatnamiid. Soai leigga Issáhiin fargga soađi maŋŋá oastán Fáškkojot gáttis Heikkilä nammasaš kruvnnadálu, mii lea ainge soga oamastusas.

Issát ja Inká fárriiga 1973 Anár girgosiidii, gos Issát nuonddahallagođii. Jagi maŋŋá Iŋgá bázii leaskan, muhto ii suige okto, dasgo birra ja guhkkeleapposge ássi mánát bearrašiiguin dolle geažos áigge buriid oktavuođaid ja fuolahedje sus. Dat čájehii, ahte Inká áhkku lei čielgasit sámebearraša árvoortnegis alimusas. Inggás báhcce maiddái ollu fuolkit Norgga bealde Guovdageainnnus.